• Official Website of Province of Agusan del Norte
Home

NASIPIT MARICULTURE PARK PAGATUKURON

alt

Agusan del Norte, August 22 --- Gitakdang pagatukoron na ang Mariculture Park sa lungsod sa Nasipit sa may Barangay Ata-atahon ug Cubi-Cubi human gi-aprobahan sa Sangguniang Panlalawigan ang Sanggunian Resolution No.041-2019, nga nagdeklarang balido ang Municipal Ordinance No. 004-2019 nga nag-establisar niini.
 
Ang mariculture park nga pagatukoron sa Brgy. Ata-atahon ug Cubi-Cubi adunay sukod nga 234 hectares diin kini usa sa mga programa ug proyekto nga gitutokan karon sa LGU sa Nasipit alang sa pagtan-aw sa kita ug kapasidad sa pagmugna og alternatibong panginabuhian para sa mga mangingisda.
 
Tumong niini nga makunhuran ang kalisod sa panginabuhian, paghatag og igong oportunidad nga trabaho ug pagtanyag sa kinaiyahan alang sa padayon nga paglambo sa maong lungsod.
 
Ang lakang mao ang pagtukod og floating fish cage aron madugangan pa ang produksyon sa isda ug kini makahatag dugang kita sa LGU pinaagi sa pag invest sa mga local investors ug stakeholders.
 
Ubos sa maong ordinansa mao ang mga deklarasyon sa palisiya para mahibaluan ang mga bahin ug ang kadaghanon sa fish cages nga pagatukoron sa usa ka investor o operator, mga probisyon, paggamit ug pagdumala sa mga pag – pangisda, apil usab niini ang mga regulasyon, prebilihiyo ug mga limitasyon sa mga mangingisda.
 
Ang ordinansa sa munisipyo nagtumong nga mapalambo, mapanalipdan ug madumalahan ang paggamit sa mga coastal areas sa lungsod nga nahisubay sa RA 8550, An Act Providing for the Development, Management and Conservation of the Fisheries and Aquatic Resources aron mahimong mabungahon ang pagpanginabuhi sa baybayon ug makab-ot ang malungtaron nga pag-uswag sa lugar. Kini usab nag tumong nga mapataas pa ang kahimtang sa pagpanginabuhi sa mga mangingisda.
 
Nagmugna usab og Nasipit Mariculture Executive Management Cuncil kun NMEMC ang maong lungsod alang sa episyente nga pagpatuman ug pagdumala sa proyekto sa mariculture park.
<